Presidenti i Brazilit, Luiz Inacio Lula da Silva përsëriti interesin e vendit për teknologjinë bërthamore të Francës, në një kohë që Brazili përgatitet të ndërtojë nëndetësen e tij të parë me energji bërthamore. "Jo për të bërë luftë, por për të garantuar të gjitha vendet që duan paqen," tha Lula Da Silva, i cili mori edhe mbështetjen e presidentit francez Emmanuel Macron. “Jemi në krahun tuaj”, u shpreh Macron sa i përket projektit që Brazili ka për ndërtimin e një nëndetëseje me energji bërthamore, por pa dhënë detaje për bashkëpunimin specifik që kërkon Brazili. Këto deklarata Macron i bëri gjatë ceremonisë për nisjen e nëndetëses së tretë braziliane të projektuar nga francezët, e cila do të ndihmojë në sigurimin e vijës së gjatë bregdetare të vendit, e quajtur "Amazona Blu". Ndërtimi i nëndetëseve u përshkrua në një marrëveshje të vitit 2008 midis Lulës dhe presidentit të atëhershëm francez Nicolas Sarkozy, e cila përfshinte gjithashtu blerjen e 50 helikopterëve Caracal. Brazili po planifikon gjithashtu të ndërtojë nëndetësen e tij të parë me energji bërthamore, Alvaro Alberto, e cila do ta bënte atë vendin e parë jashtë pesë anëtarëve të përhershëm të Këshillit të Sigurimit të OKB-së që e bën këtë. Prodhuesi francez i mbrojtjes detare Naval Group po mbështet projektimin dhe ndërtimin e nëndetëses, me përjashtim të bojlerit bërthamor që po projektohet nga brazilianët. Vizita, e para nga një president francez në gjigantin ekonomik të Amerikës Latine në më shumë se një dekadë, është gjithashtu një lëvizje për të përmirësuar marrëdhëniet që ishin përkeqësuar ndjeshëm nën drejtimin e ish-presidentit Jair Bolsonaro. Pamjet: AFP