Gjermania po tenton të shkëpusë varësinë nga Kina e Rusia, të cilën e konsideron të rrezikshme tashmë, dhe është vënë në kërkim të partnerëve të rinj të biznesit. Prej muajsh, kancelari gjerman Olaf Scholz ka nisur të përcjellë mesazhin se Azia nuk është vetëm Kina, dhe se Berlini dëshiron ta hedhë vështrimin përtej saj për investime, përfshirë këtu edhe Afrikën e Amerikën e Jugut për investime, importe dhe eksporte, JO më kot me sa duket, kreu i ekzekutivit gjerman ka zgjedhur të vizitojë Vietnamin dhe Singaporin përpara se të marrë pjesë në pjesë në samitin G20 të vendeve më të mëdha të industrializuara dhe atyre në ekspansion në Indonezi. Në të dy ndalesat, ai shoqërohet edhe nga një delegacion me sipërmarrës gjermanë. Në Singapor Scholz mban një fjalim në konferencën Azi-Paqësor të biznesit gjerman, në të cilën do të jetë edhe ministri gjerman i Ekonomisë Robert Habeck. Udhëtimi dhe veçanërisht pjesëmarrja në konferencën Azi-Paqësor janë një sinjal për diversifikimin e dëshiruar ekonomik, që synon pavarësi më të madhe nga Kina, njofton zyra e kancelarit. Largimi nga rutina fsheh gjithmonë rreziqe për firmat. Nga Ministria e Ekonomisë mësohet, se për investimet do të ketë garanci të favorshme shtetërore, me anë të të cilave kompanitë mund të sigurojnë bizneset e reja. Ndërsa garancitë për vendet si Kina do të reduktohen. Bërja e biznesit vetëm me miqtë "të varfëron", thotë politologu Heribert Dieter, e duket këtë qasje po ndjek dhe Berlini zyrtar, me bindjen se nëse i shërben interesave ekonomike, atëherë duhen mbajtur marrëdhënie ekonomike edhe me vendet problematike.