Autoriteti Kombëtar i Ushqimit në Shkodër ka bllokuar edhe 75 tonë të tjerë misër blegtoral në pikën doganore të Hanit të Hotit. Vetëm pak ditë më parë ishin ndaluar 25 tonë misër, çka e çon në 100 tonë sasinë totale të mallrave të pezulluara. Sipas AKU, misri i ardhur nga Serbia është ndaluar për analiza laboratorike me qëllim verifikimin e nivelit të aflatoksinës B1 – një substancë toksike dhe kancerogjene, e cila nëse tejkalon normat e lejuara, përbën rrezik për sigurinë ushqimore. Në kuadër të hetimit, AKU ka vendosur të pezullojë edhe aktivitetin e një ferme në fshatin Trush, pasi nga sistemi i gjurmueshmërisë rezultoi se ajo furnizohej me misër blegtoral nga i njëjti subjekt i ndaluar në doganë. Deri më tani, mbi 100 tonë misër janë bllokuar në pritje të rezultateve të analizave përkatëse. Në rast se konfirmohet prania e substancave të ndaluara, produktet nuk do të lejohen të hyjnë në territorin shqiptar. Autoriteti Kombëtar i Ushqimit ka deklaruar se po monitoron me kujdes situatën dhe se çdo ngarkesë e ardhur nga Serbia po i nënshtrohet kontrolleve të imëta laboratorike, për të garantuar që produktet e destinuara për ushqimin e blegtorëve të jenë të sigurta dhe brenda standardeve ligjore.