Numri i të vdekurve nga përmbytjet në Spanjë ka shkuar në 205. Agjencia shtetërore e motit tha se katër rajone, përfshirë Valencia, mbetën në gatishmëri për shkak të rrezikut të shirave dhe stuhive, disa ditë pasi lumenjtë shkaktuan dëme fatale. Sipas tyre kushtet e pafavorshme atmosferike pritet të vazhdojnë edhe në ditët në vijim. “Ne do të dërgojmë një mesazh të qartë. Emergjenca meteorologjike nuk ka mbaruar. Stuhia vazhdon ende mbi Spanjë”, njoftoi agjencia në mediat sociale. Disa ditë pasi përmbytjet e shpejta shpërthyen nëpër pjesë të vendit, duke marrë me vete makinat dhe dritat e rrugëve, numri i personave të zhdukur mbetet ende enigmë. Mijëra njerëz nga zonat e paprekura në rajonin e Valencias filluan të paraqiten në vendet më të goditura, duke ofruar ndihmë. Ndërsa rrugët në të gjithë rajonin mbetën të bllokuara. Balta ka pushtuar të gjithë rrugët e katet e para të ndërtesave. Në fillim të kësaj jave, më shumë se 1000 ushtarë nga njësia e reagimit emergjent të Spanjës u vendosën në Valencia për të forcuar përpjekjet e shërbimeve lokale të urgjencës.