Presidenti amerikan Joe Biden e gjeti veten në një nga momentet më të këqija të jetës së tij politike dhe debati presidencial shqetësoi shumë demokratë kur bëhet fjalë për aftësitë e tij si kandidat në zgjedhje. Debati i parë kundër Donald Trumpit përfundoi keq, ndërsa i dyti nuk pritet të ndodhë para 10 shtatorit... ose edhe mund të mos ndodhë fare. Analistët amerikanë bënë vlerësimet rreth cilësisë së debatit, por edhe se për cilat momente do të pendohen të dy kandidatët. Ata thonë se për Biden ishte natë e keqe dhe se dukej i dobët. “Ai nuk bëri gjënë thelbësore që duhej të bënte, pra të qetësonte mbështetësit për moshën e tij”, ka thënë Sem Stein i “Politiko”. Ai beson se kjo do të shkaktojë një rreth vicioz lajmesh gjatë fushatës që do t’i dëmtojnë demokratët. I pyetur nëse ka ndonjë argument që Bideni e humbi këtë debat, analisti tjetër Stiven Shepërd vëren se Biden “përforcoi atë që thonë votuesit”. “Një pjesë e konsiderueshme e votuesve të presidentit ishin tashmë të shqetësuar për kandidaturën e tij dhe presidenti bëri pak për t'i qetësuar ata. Më së shumti për moshën dhe aftësitë e tij drejtuese si burrë shteti”. Në një sondazh të New York Times, të kryer përpara debatit, vetëm 45 për qind e votuesve të mundshëm që zgjodhën Bidenin në vend të Trumpit, donin që Bideni të ishte kandidati i demokratëve. Një shifër shqetësuese 5 muaj para zgjedhjeve. Mirëpo sipas specialistëve edhe Trump nuk kaloi një natë magjike. Shumë çështje thelbësore i la pa përgjigje konkrete dhe në disa momente ishte shumë i dobët, duke deklaruar fakte kontradiktore dhe të paverifikuara. Pamjet: AFP