Në fjalimin e tij në Asamblenë e Përgjithshme të Kombeve të Bashkuara Presidenti amerikan, Joe Biden, foli për nevojën që t’i jepet fund konfliktit në Lindjen e Mesme, dhe vuri në pah mbështetjen e SHBA-së dhe aleatëve perëndimorë për Ukrainën. “Lufta në shkallë të gjerë në Lindjen e Mesme nuk është në interesin e askujt. Pavarësisht përshkallëzimit të dhunës, zgjidhja paqësore është rruga e vetme drejt paqes.” Në fjalimin e tij të fundit si president në OKB, Joe Biden insistoi se pavarësisht konflikteve globale, ai mbetet me shpresë për të ardhmen. “E di që shumë e shohin botën sot dhe shohin vështirësi e reagojnë me dëshpërim, por unë nuk veproj kështu. Gjithmonë ka forca që duan të na përçajnë, por Jemi më të fortë sesa mendojmë, kur veprojmë së bashku”. Lidhur me sulmet mes Izraelit dhe hezbollahut, që rrezikojnë ta shtyjnë Lindjen e Mesme akoma edhe më thellë në “kaos”, Sekretari i përgjithshëm i OKB-së, Antonio Guterres deklaroi se populli i Libanit, populli i izraelit dhe popujt e të gjithë botës nuk mund të lejojnë që Libani të shndërrohet në një Gaza të dytë. Ndërkohë Zëdhënësi i Pentagonit njoftoi se Shtetet e Bashkuara po dërgojnë një numër të vogël trupash shtesë në Lindjen e Mesme pas intensifikimit të luftimeve mes Izraelit dhe militantëve të Hezbollahut, pa dhënë më shumë hollësi megjithatë mbi numrin e forcave apo rolin e tyre në Lindjen e Mesme. Departamenti amerikan i Shtetit ka paralajmëruar qytetarët amerikanë që të largohen nga Libani për shkak të rritjes së rrezikut të një lufte rajonale.