Presidenti i SHBA, Joe Biden, paralajmëroi Moskën se NATO nuk do të lejojë të preket asnjë centimetër i vendeve anëtare: “Ne duhet t’iu kujtojmë të gjithëve se angazhimi ndaj aleatëve tanë për të mbrojtur çdo centimetër të territorit të NATO-s është i shenjtë. Kjo padyshim i ofron Shteteve të Bashkuara një bastion sigurie të pakrahasueshëm me asnjë komb tjetër në botë. Misioni ynë ka qenë gjithmonë që të krijojmë një të ardhme më paqësore", deklaroi Joe Biden për 75-vjetorin e NATO-s, duke shtuar se aleanca tani është më e fortë dhe më e vendosur se kurrë pas anëtarësimit të Suedisë dhe Finlandës. Ndërkohë, në ditën e 771 të luftimeve mes Rusisë dhe Ukrainës, sekretari amerikan i shtetit, Antony Blinken deklaroi se Ukraina do të anëtarësohet në Nato së shpejti. Kjo solli menjëherë reagimin e ministrit të jashtëm rus, Sergei Lavrov, i cili tha se deklaratat e Blinken konfirmojnë se Kievi zyrtar nuk vepron në pavarësi, por iu bindet urdhrave të Perëndimit që kërkon të gjunjëzojë Rusinë. Pamjet: AFP