Një aksident i rëndë ndodhi mbrëmjen e së premtes në aksin nacional Berat-Poliçan, në afërsi të fshatit Vodicë. Një mjet tip Porsh, që qarkullonte nga Poliçani në drejtim të Beratit, ka devijuar rrugën dhe ka rënë nga ura në përrua. Si pasojë e aksidentit, gjeti vdekjen e menjëhershme drejtuesi i mjetit Endri Vrushaj, 34-vjeç, banues në lagjen "Vakëf" në Berat dhe janë plagosur rëndë dy pasagjerët, shtetasit Alban Elezi, 36-vjeç dhe Gisi Shehu, 37-vjeç, të dy banues në lagjen "Barrikadë" në Berat. Të plagosurit janë transportuar fillimisht drejt Spitalit Rajonal Berat por për shkak të gjendjes së rëndë shëndetësore, ata janë transportuar me urgjencë drejt Spitalit të Traumës në Tiranë. Në vendngjarje shkuan forca të shumta policie që bënë të mundur edhe nxjerrjen e mjetit nga përroi me ndihmën e shërbimeve zjarrfikëse. Policia po punon për zbardhjen e shkaqeve të aksidentit të rëndë.