Qindra njerëz janë përfshirë në një shkëmbim zjarri dhe përleshje që lidhet me trafikun e drogës dhe që la pesë persona të plagosur rëndë në qytetin francez të Poitiersit. Lajmin e konfirmoi të premten ministri i Brendshëm Bruno Retelio. Ajo që filloi si të shtëna jashtë një restoranti të enjten mbrëma, përfundoi në përleshje masive midis bandave rivale që përfshiu 400 deri në 600 njerëz, ka thënë Retelio. Mes të plagosurve është një 15-vjeçar i cili mori plagë në kokë. Kryebashkiakja Leonor Monkond tha se incidenti ishte “i papranueshëm”. Ajo shtoi se ishte veçanërisht shqetësuese përfshirja e të rinjve. Ministri Retelio bëri të ditur se do të udhëtojë më vonë në qytetin veriperëndimor të Ren, ku një 5-vjeçar u qëllua në kokë në një tjetër incident të lidhur me drogën javën e kaluar, sipas mediave lokale. Në intervistën e tij, Retelio e dënoi atë që e quajti “meksikanizimin” e Francës. “Këto të shtëna nuk po ndodhin në Amerikën e Jugut, po ndodhin në Ren, Poitiers, në këtë Francë perëndimore dikur e njohur për qetësinë e saj”, ka thënë ai. Franca viteve të fundit është përballur me rritje të krimit që lidhet me drogën në të gjithë vendin.