Në vazhdën e hetimeve mbi atentatin ndaj ish presidentit amerikan Donald Trump, autoritetet amerikane shfaqen të bindura se sulmuesi 20 vjecar Thomas Crooks veproi i vetëm. Teksa motivi i sulmit vazhdon të mbetet një mister, bindja e krijuar nga zyrtarët përgjegjës është se i riu kishte një “përzierje ideologjish”. Agjentet e FBI-së kanë kontrolluar historikun e kërkimit të Crooks dhe publikuan foto të armës që ai përdori dhe mjeteve shpërthyese të improvizuara të gjetura në makinën e tij. Sipas kreut të zyrës së Byrosë Federale të Hetimit në Pittsburgh, Kevin Rojek, Crooks kishte filluar të kërkonte në internet për ngjarjet e fushatës Trump që nga shtatori 2023. Ai kishte kontrolluar edhe për tubimet e presidentin Joe Biden, i cili ishte ende kandidati demokrat në kohën e të shtënave, si dhe për vendndodhjen e konventave kombëtare republikane dhe demokrate.