Aleatët evropianë janë rreshtuar sërish në mbështetje të Ukrainës, duke theksuar se çdo bisedim pa Kievin nuk do të sjellë paqe të vërtetë. Në një deklaratë të përbashkët, liderët e Mbretërisë së Bashkuar, Francës, Italisë, Gjermanisë, Polonisë, Finlandës dhe Komisionit Evropian theksuan se “kufijtë ndërkombëtarë nuk mund të ndryshohen me forcë” dhe se Ukraina ka të drejtën të zgjedhë vetë të ardhmen e saj. Deklarata u publikua përpara takimit të planifikuar të presidentit amerikan Donald Trump me homologun rus Vladimir Putin në Alaskë, të premten. Shtëpia e Bardhë ka bërë të ditur se Trump është i gatshëm të zhvillojë një takim trepalësh ku të marrë pjesë edhe presidenti ukrainas Volodymyr Zelensky, por për momentin samiti mbetet mes Trump dhe Putinit, siç ishte kërkesa fillestare e Kremlinit. Zelensky ka paralajmëruar se çdo vendim i marrë pa përfshirjen e Ukrainës do të jetë “i pavlefshëm” dhe “kundër paqes”. Reagimi i tij u ashpërsua pasi Trump sugjeroi mundësinë e “shkëmbimit të territoreve” si pjesë e një marrëveshjeje. Sipas raporteve të CBS, administrata amerikane po përpiqet të bindë disa aleatë evropianë të pranojnë një marrëveshje që do t’i linte Rusisë të gjithë rajonin e Donbasit dhe Gadishullin e Krimesë. Putin deri më tani ka refuzuar disa mundësi për t’u takuar drejtpërdrejt me Zelenskyn. Që prej nisjes së pushtimit të plotë tre vite më parë, të dy liderët nuk janë ulur në një tryezë bisedimesh. Zelensky u shpreh se “nuk do të shpërblejmë Rusinë për atë që ka kryer” dhe se “linja e frontit nuk mund të kthehet në kufi”. Aleatët evropianë, të shqetësuar edhe për mungesën e ndikimit në rezultatin e mundshëm të takimit Alaska, theksuan se një zgjidhje diplomatike është kritike jo vetëm për mbrojtjen e Ukrainës, por edhe për sigurinë e vetë Evropës. Presidenti francez Emmanuel Macron deklaroi se “Evropianët duhet të jenë pjesë e zgjidhjes, pasi në rrezik është siguria e tyre”. Samiti në Alaskë, territor i blerë nga SHBA në vitin 1867, do të ishte i pari mes një presidenti amerikan dhe një presidenti rus që prej takimit Biden–Putin në Gjenevë në vitin 2021. Vetëm nëntë muaj pas atij takimi, Rusia nisi pushtimin e plotë të Ukrainës, duke shpallur në vitin 2022 aneksimin e katër rajoneve ukrainase – Donetsk, Lugansk, Zaporizhzhia dhe Kherson – pavarësisht se nuk ka kontroll të plotë mbi to.