Plot 27 kilogramë lëndë narkotike u zbuluan në një shtëpi në Vigevano në Itali. 22 kilogramë hashash të ndara në 122 pako ndodheshin brenda frigoriferit, ndërsa 5 kilogramë të tjerë kokainë, të vulosura me një imazh të Al Pacinos në filmin “Scarface”, të fshehura në vende të ndryshme. Hetimet u kryen nga Karabinierët e Njësisë së Operacioneve të Kompanisë së Qendrës së Xhenovës, të cilët kishin vënë re një 29-vjeçar shqiptar në sjellje të dyshimtë dhe e ndoqën drejt apartamentit, ku banonte. Teksa u ndalua nga policët, 29-vjeçarit iu gjetën 58 gramë kokainë dhe pas kontrollit në shtëpinë e tij, u zbulua sasia e madhe e substancës narkotike. Efektivët gjetën gjithashtu 7 mijë euro, që dyshohet se janë të ardhura nga trafiku i drogës. 29-vjeçari u arrestua dhe u dërgua në burgun e Pavias, teksa vijon hetimi ndaj tij.