Autoritetet amerikane arrestuan autorin e vrasjes së aktivistit konservator Charlie Kirk, dy ditë pas ngjarjes që tronditi vendin. Lajmi u bë i ditur nga Presidenti i Shteteve të Bashkuara të Amerikës, Donald Trump, sipas të cilit, ishte babai i autorit që ndihmoi për dorëzimin e tij. Ndërsa falënderoi autoritetet për kapjen e vrasësit, Presidenti Trump shprehu hapur dëshirën për dënimin e tij me vdekje. “Kirk ishte një nga njerëzit më të mirë, nuk e meritonte këtë. Shpresoj që t'i japin dënimin me vdekje autorit. Babai i tij, një besimtar i devotshëm, e bindi të birin të dorëzohej. I dyshuari është në paraburgim tani”. Autori është identifikuar si Tyler Robinson, 22-vjeç nga Utah. Sipas autoriteteve në një nga plumbat që ai nuk kishte përdorur ende, kishte shkruar: “Bella Ciao”. Presidentit Trump ndërkohë ka sqaruar se para arrestimit të tij, babai shkoi më parë te një marshall amerikan, që po ashtu ndihmoi në procesin e kapjes së autorit. Charlie Kirk, një nga aktivistët konservatorë të profilit të lartë dhe figurë e besuar e presidentit Donald Trump, u qëllua për vdekje me armë zjarri, në moshën 31-vjeçare, në një kolegj në Utah. Kirk ishte i njohur për debatet e tij në kampuse universitare në mbarë vendin, ku shpesh u vinte përballë studentëve tema të nxehta si identiteti transgjinor, ndryshimet klimatike, besimi dhe vlerat familjare. Në vitin 2012, vetëm 18 vjeç, ai bashkëthemeloi organizatën studentore Turning Point USA (TPUSA), e cila synonte të përhapte idealet konservatore në universitetet amerikane, të perceptuara kryesisht si liberale. Kjo organizatë ka degë në më shumë se 850 kolegje dhe universitete, si dhe luajti një rol vendimtar në mobilizimin e votuesve për Trump dhe republikanët në zgjedhjet e fundit, si një faktor kyç në regjistrimin e dhjetëra mijëra votuesve të rinj dhe në kthimin e Arizonës në favor të Presidentit. Kirk mori pjesë në inaugurimin e Trump në Ëashington në janar dhe ishte një vizitor i rregullt i Shtëpisë së Bardhë gjatë të dy mandateve presidenciale.