Një person humbi jetën dhe tre të tjerë u plagosën në një aksident rrugor në aksin Lushnje -Fier. Një autoambulancë që po transportonte një të sëmurë nga Vlora drejt spitalit të Tiranës u përplas me një kamion. Ngjarja ndodhi në vendin e quajtur “Rotondo e Savrës”. Sipas burimeve pranë grupit hetimor, dy automjetet po udhëtonin në të njëjtin drejtim. Por pak metra para kryqëzimit të Savrës, ambulanca u fut në parakalim dhe gjatë tentativës u përplas me anën e majtë të kamionit e më pas me trafikndarësen. Si pasojë e goditjes së fortë, ndërroi jetë në vend pacienti 77-vjeçar Dashmir Kocaj, ndërsa morën plagë të shumta në trup shoferi autoambulancës, infermieri si dhe vajza e viktimës. Të plagosurit u dërguan drejt spitalit ku po marrin ndihmë mjekësore. Ndërkohë hetuesit po punojnë për sqarimin dhe zbardhjen e plotë të rrethanave dhe shkakut të aksidentit.