Telefonata e një vajze 21 vjeçare në polici mesditën e sotme se ishte dhunuar nga disa persona ka alarmuar policinë e cila blindoi këtë pallat zonën e Astirit në Tiranë. Në kushte të rënduara psikologjike, dyshohet se vajza ka kërcënuar se do të hidhej nga kati i 8 i banesës dhe pasi negociatat dështuan, efektivët u detyruan të ndërhynin nga dritarja. Pasi u futën brenda, Forcat e Ndërhyrjes së Shpejtë, gjetën vajzën e vetme në banesë, ambient i cili dyshohet se ishte marrë me qira nga i dashuri i saj. Nga kontrollet në apartamentet e tjera në këtë pallat, policia ka konfirmuar se janë gjetur dy armë zjarri në një banesë tjetër, e cila po ashtu dyshohet se ishte marrë me qira nga i njëjti person. Aktualisht e reja Sarma Qordja, ndodhet nën asistencën e stafit mjekësor ku pritet të merret ne pyetje për të zbuluar detajet rreth personave që ajo ka pretenduar se e kanë dhunuar. Ndërkohë policia thotë se nga këqyrja paraprake, në trupin e vajzës nuk janë konstatuar shenja dhune të dukshme. Ende nuk dihet nëse në ngjarje janë një apo më shumë persona të përfshirë, ndërsa policia po heton për identifikimin e poseduesit të armëve.