Një aksident rrugor me pasoja tragjike është regjistruar mbrëmjen e së dielës në qytetin bregdetar të Durrësit. Rreth orës 18:44, në rrugën paralele me Portin e Durrësit, në afësi të stacionit të trenit, një automjet tip “Benz”, i drejtuar nga një 28-vjeçar, ka përplasur një këmbësor. Si pasojë e përplasjes së fortë, këmbësori, i identifikuar nga policia si Rifat Murra, 68 vjeç, ka ndërruar jetë në vend nga dëmtimet e rënda. Drejtuesi i mjetit është shoqëruar fillimisht në Komisariat për veprimet procedurale dhe më pas mësohet se është ndaluar, ndërsa grupi hetimor po punon për të zbardhur rrethanat dhe shkaqet e plota të aksidentit. Ky aksident i shtohet bilancit të rëndë të ngjarjeve rrugore të regjistruara që në ditët e para të këtij viti. Fillimi i vitit është shoqëruar me disa aksidente të rënda në zona të ndryshme të vendit, disa prej tyre me pasoja fatale për jetën, duke ngritur shqetësimin mbi sigurinë rrugore dhe respektimin e rregullave të qarkullimit nga përdoruesit e rrugës.