Rreth 400 mijë njerëz morën pjesë në funeralin madhështor të Papa Franceskut, sipas Ministrisë së Brendshme të Italisë. Pas ceremonisë madhështore mortore në nder të Papa Françeskut, që u mbajt në Bazilikën e Shën Pjetrit dhe u pasua nga kortezhi solemn në rrugët e Romës deri në Bazilikën e Shën Marisë së Madhe, reagoi dhe kryeministrja italiane, Giorgia Meloni, e cila vlerësoi organizimin dhe angazhimin institucional të treguar gjatë kësaj dite historike. “Dua të theksoj përkushtimin e madh dhe efikasitetin e jashtëzakonshëm që u tregua nën koordinimin e Departamentit të Mbrojtjes Civile. Të gjithëve u shpreh falënderimet e qeverisë dhe të miat personale për profesionalizmin, përkushtimin dhe frymën e shërbimit që treguan, duke siguruar zhvillimin e qetë të një dite historike për Italinë dhe për gjithë botën”, tha kryeministrja Meloni. Papa Françesku, i njohur për përulësinë, përkushtimin ndaj të varfërve dhe përpjekjet për reformimin e Kishës Katolike, do të mbahet mend si një nga papët më të dashur dhe më progresistë të kohës moderne.