Me rreth 400 hektarë brenda 24 orëve është shtuar sipërfaqja e tokave të përmbytura në Bashkinë e Shkodrës. Deri më tani, uji është poshtë nivelit për të rrezikuar banesat, por gjithsej 945 hektarë rezultojnë të përmbytura. Mëngjesin e sotëm, rruga e fshatit Obot ka qenë e pakalueshme edhe për mjetet e ushtrisë, duke rikthyer në përdorim varkat. Banorët akuzojnë se uji është shtuar mbrëmjen e kaluar gjatë natës, ndërkohë që Bashkia Shkodër, nga ana tjetër, thotë se shkarkimet nga hidrocentralet janë ulur, por efekti i tyre është dhënë më vonë në Obot. Uji është shtuar edhe në fshatin Muriqan, duke përmbytur toka dhe të mbjella, por jo banesat. Edhe në lumenjtë Buna dhe Drin, si dhe në Liqenin e Shkodrës, prurjet janë të shumta, por mbeten nën kuotën kritike.