Më shumë se 30 persona në Ukrainë u plagosën pas një sulmi të ndërmarrë nga forcat ruse në një qytet në rajonin lindor të Harkivit. Mes të lënduarve ishin dhe nëntë fëmijë. Guvernatori rajonal i Harkivit, Oleh Synehubov, tha në Telegram se ngjarja ndodhi gjatë orëve të pasdites, ndërsa nga bombardimet u dëmtua një ndërtesë si dhe u dogjën disa makina. Raketa ruse goditi parkinung jashtë bllokut të banimit por si rrjedhojë e shpërthimit shumë xhama u thyen e si pasojë morën plagë të shumta banorët që jetonin aty. Ata u dërguan me urgjencë drejt spitalit për ndihmë mjekësore. Ndërkohë nga ana tjetër forcat ukrainase po vijojnë luftimet me trupat ushtarake ruse. Shtabi i Përgjithshëm i Ushtrisë së Ukrainës raportoi për luftime të ashpra në zonat e Bahmutit, Limanit, Avdivkas dhe Marinkas në Donjeck. Ushtria ukrainase tha gjithashtu se forcat ruse kryen 56 sulme ajrore dhe 77 sulme nga sistemet e raketave, duke vrarë dhe plagosur shumë civilë. Luftimet u përshkallëzuan pas sulmit me dron në aeroportin Vnukovo në Moskë, ku rusia akuzoi drejtpërdrejt Ukrainën si organizatore.