Të tjera ndihma humanitare u hodhën në Rripin e Gazës. Pamjet e AFP-së tregojnë avionin e ushtrisë amerikane C-17, që hedh ndihmat mbi Gazën veriore. Agjencitë e OKB-së dhe grupet e ndihmave humanitare kanë paralajmëruar se shumë nga 2.4 milionë banorët e Gazës janë në prag të urisë, pasi vendet donatore japin ushqime në mënyrë sporadike. Më herët, një sulm ajror izraelit ndaj një kampi me tenda jashtë një spitali në Gazën qendrore, la të vrarë dy palestinezë dhe plagosi 15 të tjerë. Sulmi goditi disa tenda ku mijëra persona për muaj të tërë po strehohen pasi janë zhvendosur nga shtëpitë e tyre për shkak të luftës në pjesën tjetër të territorit. Izraeli akuzon Hamasin, grupin palestinez të shpallur organizatë terroriste nga Shtetet e Bashkuara dhe Bashkimi Evropian, dhe grupet e tjera militante se operojnë në dhe përreth ndërtesave shëndetësore. Ushtria izraelite ka thënë se ka vrarë dhjetëra luftëtarë, përfshirë edhe operativë të lartë të Hamasit. Familjet palestineze që janë larguar nga zona, përfshirë edhe ata që paraprakisht ishin zhvendosur për shkak të luftës, thanë se janë urdhëruar që të largohen për në jug nga ushtarët izraelitë pas ditësh luftime të ashpra. Pamjet: AFP