Plagosja në Astir një vit më parë/ Arrestohet te sheshi “Shqiponja” 36-vjeçari i shpallur në kërkim

Ka rënë në pranga në Tiranë, një 36-vjeçar i shpallur në kërkim për plagosje të rëndë me dashje. Shërbimet e Komisariatit të Policisë Nr. 1 Tiranë, bazuar në informacionet e marra në rrugë operative për një shtetas të shpallur në kërkim që lëvizte në këmbë te sheshi “Shqiponja” kanë organizuar punën dhe kanë kapur e ndaluar shtetasin M. H., 36 vjeç, banues në Tiranë. Ky shtetas ishte shpallur në kërkim nga Komisariati i Policisë Nr. 6, pasi Gjykata e Rrethit Gjyqësor Tiranë i ka caktuar masën e sigurimit “Arrest në burg” në mungesë, për veprën penale “Plagosja e rëndë me dashje”, sepse në dhjetor të vitit 2019, në Astir, ka plagosur me sende të forta shtetasin I. L. Materialet i kaluan Prokurorisë së Rrethit Gjyqësor Tiranë, për veprime të mëtejshme.