Tjetër firo nga radhët e Partisë Demokratike pas humbjes së zgjedhjeve të fundit parlamentare. E fundit që ka zgjedhur të largohet pas një jete në radhët e PD është Jola Hysa. Kjo e fundit ka mbajtur pozicionin e Sekretares për Marrëdhëniet me Publikun dhe ishte anëtare e kryesisë së PD. Ajo ka shpjeguar në një status të gjatë arsyet që e shtynë të largohej nga cdo angazhim i saj politik në radhët e PD-ës. Hysa tregon pakënaqësi për respektimin e pozicionit të saj, listën e Durrësit, listën e këshillave bashkiak, mënyrën se si u trajtua situata për zgjedhjen e avokatit të populli dhe kryesorja për të mungesa e hapjes së PD. Megjithatë, largimi i saj shton dhe zërat për joshjen e mundshme me ndonjë pozicion nga Partia Socialiste. Hysa nuk do të ishte e para, pasi Dashnor Sula u zgjodh si kryeinspektor i përgjithshëm nga ana e Edi Ramës. Përvec ish-deputetit të PD, dhe Sara Bodo, ish-drejtuesja e FRPD në Vlorë është zgjedhur drejtoreshë e Agjencisë së Rinisë duke u rreshtuar zyrtarisht me socialistët. Genc Deromemaj në Vlorë është një tjetër ish-anëtar i kryesisë së PD, madje dhe kandidat zyrtar për bashkinë e qytetit, që braktisi shtabin e tij politik për të kaluar në radhët e socialistëve. Ai madje u emërua në krye të kadastrës së Vlorës, post që e mbajti për 4 muaj, pasi u largua me dorëheqje.