Ankandi për ndërtimin e parkut fotovoltaik të Spitallës është finalizuar ditën e sotme, ku kompania franceze “Voltalia” është shpallur fituese. Është një park me kapacitet prej 100 megavatësh i cili do të ngrihet në një sipërfaqe prej 120 hektarësh. Ky është një hap tjetër drejt diversifikimit të burimeve të energjisë, pas parkut fotovoltaik të Karavastasë. “Pasi u mbyll propozimi në datën 1 shkurt, ne patëm gjithë mundësinë që të shikonim me detaje ofertat e ardhura nga 5 kompani të mëdha. Kanë treguar interes për të investuar në Shqipëri. Siç kemi rënë dakord prej kohësh, do të zhvillojmë ankande hibride që do të bazohen në dy pjesë atë të energjisë diellore dhe atë të energjisë së erës, eolike. Ky park është i dizenjuar për të prodhuar 100 mgv energji. 70 do të blihen nga operatori i shpërndarjes, një çmim i favorshëm duke përdorur bursën apo mënyra të tjera për të treguar këtë sasi. Sot kemi dy kompani të cilat e kanë kaluar fazën e vlerësimit teknik, ‘Voltalia’ kompania franceze dhe kompania kineze ‘Universe Energy’”, tha Balluku. Kompania kineze “Universe Energy” ofroi një tarifë financiare prej 46 euro për megavat, ndërsa kompania franceze “Voltalia” ofroi 29.89 euro për megavat. Kompania fituese u shpall “Voltalia” me çmimin 29.89, për 70 megavat që do të shiten me PPA. Drejtori i zyrës së Bankës Europiane për Rindërtim dhe Zhvillim (BERZH) në Tiranë, Matteo Colangeli “Kjo do të stabilizojë sektorin energjetik duke zbutur ndryshimet klimatike që lidhet me sasinë e reshjeve, është një hap i madh përpara që Shqipëria të bëhet një transportues i madh i energjisë së pastër në rajon. Gjersa kuadri ligjor nxitet nga Brukseli , energjia e pastër do të bëhet më e fuqishme, faleminderit për bashkëpunimin”, tha Colangeli.