Pas 10 vitesh i njëjti ekip i Top Channel rikthehet në familjen Xhemalaj. Isaleo të cilin anëtarët e familjes rome e gjetën një ditë vere në një kontenier mbeturinash është bërë një djalë i madh dhe tashmë shkon në klasë të pestë. Isaleo, 12 vjeç e di mirë historinë e tij. Kujtimet e fëmijërisë si kjo karrocë janë më të dashurat për të. Por i rritur me mundime nga familja që i shpëtoi jetën dhe që dashurinë nuk ia kanë kursyer asnjëherë. Isaleo nuk kërkon t’i njohë prindërit biologjikë që e braktisën. Në familjen rome ashtu si 10 vjet më parë asgjë ska ndryshuar. Për baba njeh Leonardin djalin e shtëpisë. Ai e gjeti dhe e solli në shtëpi dhe gjyshja Noçe e ëma e Leonardit e ka rritur Isaleon. Sot ata ende jetojnë me të ardhurat nga kanaçet që mbledhin në koshat e mbeturinave. Por familja rome që e rriti kërkon që Isaleon të shpëtojë një herë e mirë nga koshat. Ata duan që e ardhmja e tij të jetë ndryshe dhe mos varet mbijetesa nga plehra, atje ku ia shpëtuan jetën 12 vjet më parë.