Përplasja me dy viktima e ndodhur në Kavajë në 29 mars të këtij viti mori një tjetër jetë këtë të dielë, ku protagonistë ishin sërish pjesëtarët e familjes Rexha dhe Gosa. Sherri banal i ndodhur në fund të marsit, mes Armand alias Edmond Gosës nga Kavaja dhe Sali alias Altin Rexhës nga qyteti i Kukësit i mori jetën të dy shtetasve pas përplasjes me thika e pistoletë. Ngjarja mori përmasa tragjike për shkak se e gjitha u zhvillua në sy të djalit të vogël të Sali Rexhës, i cili ishte dëshmitar okular i vrasjes së babait të tij. Pavarësisht se sherri mes Gosës dhe Rexhës shkaktoi 2 viktima, pjesëtarët e familjes Rexha nuk i'a falën vrasjes në sy të fëmijës, Edmond Gosës duke organizuar një tjetër vrasje. Pasditen e të dielës, Habib Rexha ekzekutoi me plumb në kokë në sy të babait të tij, 48 vjeçarin Arjan Gosa, vëllain e Edmond Gosës, personit që i kishte vrarë të vëllain. Ky është momenti tragjik, ku babai i viktimës, sheh djalin e tij të shtrirë mbi tavolinën e lokalit ku po konsumonin kafen.