Wake Up/ 1 në 10 fëmijë shqiptarë është abuzuar seksualisht. 8 raste abuzimi vetëm në një vit

Abuzimet dhe ngacmimet seksuale ndaj nxënësve në shkolla, janë fenomene mjaft shqetësuese edhe në shoqërinë shqiptare, por akoma edhe më shqetësuese kur ato nuk raportohen nga viktimat që pësojnë këtë abuzim, apo edhe nga ata që janë në dijeni të tyre. Rastet në Shqipëri, të abuzimit seksual me të mitur brenda institucioneve të shkollave, herë të raportuara në media, dhe herë nga organizata që merren me të drejtat e fëmijëve dhe të rinjve, nuk janë të pakta në vendin tonë. Gjatë vitit 2018-2019 janë raportuar 8 raste të abuzimit seksual, ku disa prej tyre kanë ndodhur brenda ambienteve të shkollës, nga mësuesi por edhe nga nxënës më të rritur se viktimat që kanë pësuar këtë abuzim. Në rezultatet e fundit të studimit Becan, që është u vetmi studim i kolauduar për abuzimin seksual ndaj fëmijëve në Shqipëri, rezulton se 1 në 10 fëmijë është ngacmuar apo abuzuar seksualisht. Por si është situata në realitet, a ka raste të tjera të raportuara, dhe çfarë efektesh në shëndetin mendor ka ngacmimi apo abuzimi seksual tek të miturit, sot diskutuam me Mirgit Vatajn, Drejtor i Alo 116111 dhe mjeken psikiatre Arjana Rreli.