Mbledhja e Këshillit Bashkiak të Tiranës këtë të martë është një moment thelbësor jo vetëm për Erion Veliajn dhe PS-në, por edhe për institucionet ligjore dhe kushtetuese në Shqipëri. Këtë të martë Këshilli Bashkiak i Tiranës mblidhet për një nga seancat më të rëndësishme të historisë së tij të fundit, duke krijuar kështu dhe një precedent. Pas më shumë se shtatë muajsh që kryebashkiaku i Tiranës Erion Veliaj ndodhet në paraburgim, me masë sigurie të vendosur nga SPAK, diskutohet dhe votohet shkarkimin i tij. Proceduart nisëm pasi vetë kryeministri Edi Rama kërkoi në mbledhjen e Asamblesë Kombëtare të PS-së zgjedhje të reja për bashkinë e kryeqytetit, e madje duke bërë të ditur dhe emrin e kandidates, Ogerta Manastirliu. Veliaj, në një letër drejtuar këshilltarëve, ka kërkuar të marrë pjesë në mbledhje dhe të dëgjohet personalisht përpara se të merret një vendim për fatin e tij politik. Ai argumenton se nuk është informuar në mënyrë zyrtare për mbledhjen dhe se mungesa e tij nuk ka qenë vullnetare, por e shkaktuar nga masa e sigurisë së gjykatës. Kjo, sipas tij, cenon të drejtën për mbrojtje dhe shkon kundër standardeve kushtetuese. Nga ana tjetër, PS duket e vendosur të ecë me ritëm të shpejtë. Këshilli bashkiak përmes sekretarit i bën të ditur kryebashkiakut në qeli se në rast të pamundësisë për të qenë prezent në mbledhje, atëherë observacionet t’i përcjellë me shkrim pranë këshillit bashkiak. Një përgjigje e kundërpërgjigje mes të dy palëve por çështja ligjore mbetet e komplikuar. Ende nuk ka një vendim përfundimtar ndaj Veliajt, ai mbetet i pafajshëm derisa të provohet ndryshe. Në rast se Këshilli Bashkiak voton pro shkarkimit dhe Kryeministri e firmos vendimin, Veliaj ka të drejtën ta ankimojë në Gjykatën Kushtetuese. Ky hap mund të pezullojë procesin dhe të vonojë zgjedhjet e reja, duke futur Tiranën në një periudhë pasigurie institucionale. A do të mjaftojë vota e këshilltarëve për ta larguar nga detyra, apo Gjykata Kushtetuese do të ndalojë procesin? A është ky fundi politik i Erion Veliajt, apo fillimi i një beteje të re ligjore?