Janë gjashtë kandidatë që do të dalin më 14 maj në zgjedhjet vendore të cilat do të përcaktojnë kryetarin e ardhshëm të Bashkisë së Tiranës, aty ku gara është dhe më intensive në krahasim me bashkitë e tjera. PS rivjen me Erion Velinë që synon një mandat tjetër si kryebashkiak, në fakt të tretin. Përballë tij, është kandidati i primareve Belind Këlliçi nën siglën e koalicionit “Bashkë fitojmë”, ai i PD-së zyrtare me kryetar të komanduar Alibeajn, Roland Bejko. Në garë për Tiranën janë edhe Arlind Qori , kandidat i “Lëvizjes Bashkë” dhe Marko Dajti nga partia “Fronti i Majtë”. Tirana ka dhe një grua në garë për kryetar bashkie. Ajo është Lajla Përnaska, nga Partia “Drejtësi Integrim dhe Unitet”. Pak kilometra larg Tiranës, në Durrësin bregdetar në garë janë Emirjana Sako e PS-së. Sako, ishte zv/kryebashkiake, por në prill 2020 ju desh të zëvëndësonte shefin e saj Zhuljen Varfajn, që dha dorëheqjen nga posti. Përballë saj, është kandidati i Primareve ish deputeti Igli Cara. Në Elbasan, gara është mes kryebashkiakut aktual Gledian Llatja i cili në 2019 nga prefekt i qarkut kaloi në krye të bashkisë. Përballë tij është kandidati opozitar i koalicionit Berisha-Meta, Luçiano Boçi. Ky i fundit në mars dorëzoi mandatin e deputetit për të mundësuar garimin në zgjedhjet vendore të 14 majit. Në kryeqendrën e veriut, Shkodrën, kandidon Benet Beci, që po ashtu la mandatin e ligjvënësit për të garuar për PS-në në zgjedhjet vendore. Ai do të ketë përballë, Bardh Spahinë, që drejton aktualisht Bashkinë e Shkodrës që nga marsi i 2022, kur fitoi zgjedhjet e pjesshme vendore. (Ardi Pulaj)