Në Wuhan, pas izolimit, ka pasur një trefishim të kërkesave për martesa aq sa kanë bllokuar dhe nxjerrë jashtë përdorimit edhe programin e regjistrimit të martesave online. Por po aq ka qenë dhe numri i divorceve. Me sa duket në qytetin ku nisi gjithçka izolimi dhe Kovidi ka lënë pasoja dhe në jetën sociale të banorëve. Gazetari Edison Myrteza, i cili ka jetuar rreth 2 vite në qytetin e Wuhanit tha se "ka një procedurë përsa i përket martesave që kryen në Kinë. "Nuk është e mundur të shkosh direkt në Bashki por duhet minimumi 2 javë për qytete e vogla ose 1 muaj për qytete e mëdha të caktosh datën e martesës. Sipas këtyre të dhënave rezulton se ka një numër të madh personash që kanë kërkuar lidhje në martesë. Ka pasur shumë çifte që për shkak të izolimit nuk kanë mundur të jetojnë bashkë, të cilët pasi kanë dalë nga izolimi kanë vrapuar të bëjnë procedurat për martesë. Ndërkohë po kaq i madh ka qenë edhe numri i divorceve, aq sa nuk përballohej dot sidomos në qytete jashtë Wuhanit. Për fat të keq Kina botërisht ka numrin më të madh të divorceve në botë por kjo epidemi i ka shumëfishuar ato"- tha gazetari Edison Myrteza i cili aktualisht jeton në Pekin.