Klubi i dramës është formuar nga një grup studentësh të fakultetit të Historisë dhe të Filologjisë, nën drejtimin e pedagoges Erenestina Halili. Që nga viti 2013, këta studentë kanë vënë në skenë disa pjesë dramatike, prozë apo poezi, jo vetëm në auditoret e universitetit por edhe në skena teatri. Në 2014 ky grup ka interpretuar Milosaon në Itali, ku kanë zhvilluar 14 shfaqje. Po ashtu kanë dhënë disa herë shfaqje në Teatrin Metropol, në atë Eksperimental, në Elbasan, Vlorë si edhe kanë marrë pjesë në Festivalin e Monodramës. Vitin e kaluar në qershor, për herë të parë në Shqipëri kanë vënë në skenë në arbërisht dramën "Emira", dramën e parë shqipe të shkruar nga Françesko Anton Santori. Duke qënë se sot është edhe dita botërore e librit, ata kanë përgatitur edhe një video kolazh si shenjë vlerësimi për autorët të cilët kanë përvjetorët e tyre këtë vit. Ky kolazh zgjat 16 minuta dhe vjen nën titullin "Vox-littera 2020" (Zëri i të shkruarit). Për të kuptuar më shumë ne kishim paralelisht në skype me dy studentë, anëtarë të këtij klubi, Sonja Llana dhe Eqerem Torra. Sonja është nga Durrësi dhe ka katër vite pjesë e këtij klubi. Eqeremi është nga Tirana, ka tre vite në këtë klub dhe është asistent regjisor i tij.