Tre muskutjerët e muzikës shqiptare kantautori Elton Deda dhe këngëtarët Aleksandër Gjoka dhe Redon Makashi tashmë kanë kapërcyer kufijtë. Ata kanë ndezur skenën me koncertin e tyre të mbajtur në Athinë me 8 shkurt dhe sot do vijojnë me koncertin e radhës që do të mbahet në Selanik në orën 20:00 në mbrëmje. Ky koncert vjen në bashkëpunim me orkestrën simfonike të muzikës moderne të radio televizionit grek (ERT), ku marrin pjesë edhe artistët grek Kristo Dantis dhe Thanasis Polikandriotis. Koncerti i titulluar “Rroku bashkon njerëzit” nisi në Amfiteatrin e Tiranës në muajin tetor 2019 për të vijuar më pas me dy koncertet në fjalë. Theksojmë se një pjesë e të ardhurave nga shitja e biletave, siç është bërë e ditur më herët, do të shkojnë për fondin e rindërtimit të shtëpive të prekura nga tërmeti i 26 nëntorit në Shqipëri.