Tedi Papavrami është një ndër violinistët më të njohur shqiptarë në botë. Prej disa vitesh ai jeton në Gjenevë të Zvicrës, ndërkohë që karriera e tij është e shtrirë në Europë, Afrikë, Turqi, Japoni, Izrael apo edhe më gjerë. Gjatë kësaj periudhe në izolim atij i është dashur që të anulojë shumë koncerte të cilat me siguri do të vijojnë në një moment të dytë. Ndërkohë ai luan pa shkëputje në violinë pasi jep edhe mësim online nga shtëpia. Përveҫ koncerteve të shumta, ai është i angazhuar edhe si profesor në "Haute Ecole de Musique" në Gjenevë. Tedi po e kalon izolimin me bashkëshorten e tij Maki Okada, pianisten japoneze me të cilën ka qenë për herë të parë në Shqipëri në vitin 2018. Ndërsa prindërit e tij jetojnë në Francë, aty ku masat e izolimit kanë qenë shumë më të rrepta sesa në Zvicër.