Të kërkoje një dokument, fotografi apo një libër në arkivën e shtetit para disa vitesh ishte një mision shumë i vështirë. Por tani mbi 130 mijë foto dhe 12 mijë tituj që nuk i gjen në asnjë bibliotekë tani i ke online në faqen e Drejtorisë së Përgjithshme të Arkivave. Ky institucion gjithmonë është parë si një simbol i një vendi të mbyllur ku akses kishin vetëm një grup njerëzish.Sot fytyra e arkivës së shtetit ka ndryshuar plotësisht, pasi të gjithë të interesuarit kanë akses për të kërkuar një dokument të shkruar të para shumë viteve, fotografi apo edhe libra që i përkasin periudhave të hershme, aq me tepër që tashmë këto shërbime ofrohen online, duke të kursyer kohë e duke ardhur aty ku ti jeton.Dy ditë më parë, Drejtoria e Përgjithshme e Arkivave ka prezantuar dy shërbimet më të reja dixhitale, atë të fototekës dhe bibliotekës. Me mijra foto dhe tituj librash që i përkasin periudha të ndryshme historike tashmë mund të gjenden fare lehtë me disa klikime dhe të bëhen pjesë e studimeve tuaja, apo edhe atyre që janë të interesuar për një informacion më shumë. Për të mësuar më shumë se si do të funksionojnë këto shërbime, çfarë do të mund të kërkojnë të interesuarit dhe kujt do t'i shërbejnë na e shpjegoi në detaje sot Drejtori i Drejtorisë së Përgjithshme të arkivave, Ardit Bido.