Ndryshe nga pjesa më e madhe e botës që është mbyllur në shtëpi dhe po zbaton masa të rrepta, ka një shtet që ndjek rrjedhën normale të jetës dhe ajo është, Suedia. Shteti nordik ndryshe nga shumë vende të tjera ka vendosur të mos i mbylle shkollat, palestrat, kafenetë, dhe restorantet gjatë kohës së pandemisë. Por krahas kësaj, qeveria i ka nxitur qytetarët të sillen në mënyrë të përgjegjshme dhe të ndjekin udhëzimet e distancimit social. Është e paqartë se cila strategji do të provojë të jetë më efektivja madje dhe ekspertët në Suedi shprehen se është herët për te dalë në konkluzione. Por duke marrë në konsideratë dëmin e madh ekonomik të shkaktuar nga masat e ashpra të karantinës qasja e ndërmarrë në Suedi ka tërhequr tepër interes në botë. Një faktor që ka kontribuar së tepërmi që Suedia të ketë këto lloj masash të lehta është sistemi tepër i mirë shëndetësor që ky vend ka. Në asnjë çast Suedia nuk ndjeu mungesë të pajisjeve mjekësore, kapaciteteve spitalore. Madje tendat emergjencë që planifikoheshin të përdoreshin nëse do të kishte numër të lartë të pacientëve e që spitalet nuk do t’i përballonin dot, nuk u përdorën kurrë. Për më tepër se si është situata reale në Suedi kur të infektuarit rriten çdo ditë, kishim në një lidhje Skype mjekun e sëmundjeve të brendshme por edhe mjek familjeje që punon prej vitesh në Suedi, doktor Refet Nura.