Të rinjtë shqiptarë të brezit Millennials, dëshirojnë të shprehin dhe t’u dëgjohet mendimi i tyre mbi aspekte të tregut e punës, pikërisht në këtë fazë vendimtare për të ardhmen e tyre profesionale. Nëse në Evropën Qendrore tashmë ka filluar t’i kushtohet vëmendje sjelljes dhe rëndësisë që ka brezi i ri Millennials, në Shqipëri ende nuk ka një debat të shëndoshë mbi sjelljet, nevojat dhe ndikimin që të rinjtë e këtij brezi kanë apo do të kenë në suksesin apo dështimin e bizneseve, apo dhe të vetë ekonomisë dhe përparimit të vendit. Të dhënat e raporteve që do t’u prezantojmë për herë të parë tani, theksojnë shumë nga sjelljet, aspiratat dhe ambiciet e të rinjve shqiptarë. Ato nxjerrin në pah, se çfarë i motivon ata, cilat vlera përqafojnë në jetë, çfarë synojnë për të ardhmen e tyre, cilat janë ngjashmëritë dhe dallimet nga moshatarët e tyre në rajon. Gjithashtu këto të dhëna janë të dobishme edhe për punëdhënësit privatë e publikë, politikë-bërësit por edhe institucionet akademike.