Sot do të duhet të kishte nisur viti i ri akademik nëpër auditoret e të gjitha universiteteve. Por vendimi i Komitetit të Ekspertëve javën e shkuar ishte që mësimi të kryhej vetëm online, të paktën për muajin e parë të universitetit. Vendimi duket se ka gjetur papërgatitur vetë studentët, shumë prej të cilëve kanë paguar paradhënie qiratë kryesisht në Tiranë ku edhe ata janë më të shumtë, por edhe në universitetet e rretheve. Fatjon Biba, student i Drejtësisë, banues me qira në Tiranë dhe Emanuela Kamshi, studente ne UBT, banore në Qytetin Studenti në një lidhje direkte me studion e Top Albania Radios, e konsideruan të padrejtë vendimin për mbylljen e Universiteteve madje e quajtën tallje, marrjen e vendimit për mbylljen e Universiteteve vetëm 3 ditë para nisjes së mësimit, i parashikuar të niste sot më 2 nëntor. Ndërkohë që Migen Qiraxhi, i Qëndresës Qytetare tha se, mbyllja e universiteteve, ka ndezur konflikte të reja sociale pasi barra financiare e këtyre studentëve është rritur gjatë pandemisë.