Na janë bërë të zakonshme imazhet e fëmijëve që rreshtohen në studiot televizive të programeve të ndryshme që mbushin ditët dhe mbrëmjet tona dhe me një mikrofon përpara pyesin, tregojnë çfarë u pëlqen, çfarë i shqetëson, çfarë duan të dinë etj. Secili prej tyre, sigurisht është i joshur nga ekrani televiziv, nga ana tjetër vetë prindërit mendojnë se mundësia që të jep dalja në televizor mund të zgjidhë të ardhmen e fëmijës por pse jo të zgjidhë dhe problemet social-ekonomike të familjes. Një fenomen ky që ka ardhur në rritje vitit e fundit në mbarë botën përfshirë dhe vendin tonë aq sa ka filluar të bëhet shqetësues përdorimi apo keqpërdorimi i fëmijëve nga të gjithë dikush me qëllime nga më të ndryshme dikush për audiencë e dikush tjetër për të krijuar empati në opinionin publik. Sipas të dhënave të viteve të fundit nga INSTAT, fëmijët portretizohen si objekte për ngacmim emocional në 24.7 % të rasteve, si viktima në 24 % dhe performues në 14.3%.