Duke ju referuar shifrave zyrtare nga INSTAT, treguesit e përfshirjes në arsim kanë ardhur në përkeqësim në Shqipëri, pasi përqindja e fëmijëve që ndjekin e arsimin 9-vjeçar dhe të mesëm ka rënë në raport me popullsinë në grupmoshën e shkollimit. Sipas të dhënave të INSTAT numri i nxënëseve në arsimin 9-vjeçar këtë dekadë ka rënë me 30%, ndërsa në raport me vitin e parë të tranzicionit 1991, me 45%. Sot në këtë sistem ka 126 mijë nxënës më pak se dhjetë vjet më parë. Nevrus Kaptelli, president i sindikatës së pavarur të arsimit të Shqipërisë gjatë bisedës në "Wake Up" tha se arsyet kryesore mbeten varfëria, emigracioni, por edhe mentaliteti i prindërve për t'i punësuar apo martuar fëmijët e tyre në moshë të hershme. Ai tha se kjo problematikë është më e madhe në qarkun e Korçës, Elbasanit, Fierit por edhe në rrethinat e Tiranës si në Kamëz e Bathore.