Edhe pse në kohë pandemie, arsimi është një nga prioritet kryesore mes shteteve. Programi më i vjetër i Bashkimit Evropian i cili është shumë i njohur edhe në Shqipëri, Erasmus nuk do të mungojë as këtë vit. Në datat 15, 16 dhe 17 tetor në të gjithë botën do të zhvillohen ditët e Erasmus 2020. Gjatë këtyre ditëve synohet të ndahet një vizion i përbashkët i shteteve të ndryshme evropiane dhe të promovohet multikulturalizmi dhe solidariteti mes vendeve me qytetarët, median dhe politik bërësit. Për mbi 30 vjet, Erasmus ka lehtësuar shkëmbimet studentore dhe akademike mes universiteteve evropiane. Shqipëria merr pjesë në Erasmus që nga fillimi, që prej 1993 ku atëherë njihej me emrin programi Tempus. Deri tani, Erasmus+ ka siguruar grante të lëvizshmërisë (mobilitetit) për pothuajse 9 mijë studentë, studiues dhe staf nga Shqipëria, nga të cilët 119 vetëm këtë vit. Ai ka financuar 79 bursa për studentët e diplomave të përbashkëta master Erasmus Mundus (15 studentë në vitin 2020), bëri të mundur që universitetet shqiptare të ofrojnë diploma të reja të përbashkëta master me partnerët e tyre në BE, si dhe u dha mundësinë shumë të rinjve nga Shqipëria të marrin pjesë në shkëmbimet mes të rinjve, programet vullnetare dhe ato për punëtorët e rinj. Shqipëria merr pjesë në disa programe të Erasmus, përfshirë: Diploma të Përbashkëta Master Erasmus Mundus, Ndërtimi i kapaciteteve në arsimin e lartë, Mobilitet Kreditesh Ndërkombëtare dhe Jean Monnet. Sot kemi ftuar një prej përfituesve të Diplomës së Përbashkët Master Erasmus Mundus, ish studenten Ornela Bardhi e cila sot është një kërkuese shkencore.