Fejmi Daut dhe Samir Ljuma, janë dy kineastë shqiptarë nga Maqedonia, të cilët me filmin "Honeyland", ia dolën që të shkelnin në tapetin e kuq të ceremonisë së ҫmimeve "Oscar". Filmi dokumentar "HoneyLand" me regji të Lubo Stefanov dhe Tamara Kotevska është filmi i tretë nga Maqedonia e Veriut që nominohet për çmimin prestigjoz, ndërsa është i pari në historinë e vendit që ka dy nominime. Më konkretisht u nominua në kategorinë e filmit më të mirë ndërkombëtar, ku përpos tij ishin edhe filmi “Corpus Christi” nga Polonia, filmi “Les Miserables” nga Franca, “Pain and Glory” nga Spanja dhe “Parasite” nga Koreja e Jugut."HoneyLand" gjithashtu u nominua edhe në kategorinë e filmit më të mirë dokumentar, së bashku me filmat: “American Factory”, “The Cave”, “The Edge of Democracy”, dhe “For Sama”. Kjo është një eksperiencë shumë e rëndësishme për karrierën e tyre në vazhdim. Ceremonia e 92-të e ndarjes së çmimeve më prestigjioze të filmit Oscar u mbajt në Los Angeles më 9 shkurt. Ndërkohë pak ditë më parë Samir Ljuma dhe Fejmi Daut morën edhe çmimin për kinematografi më të mirë për filmin dokumentar në ndarjen e çmimit të 34-të të ASC (The American Society of Cinematographers). Ata kanë qenë në vende të ndyshme të botës, nëpër festivale të rëndësishme ku kanë prezantuar filmin e tyre. Xhirimet e këtij filmi ka zgjatur tre vite dhe personazhi kryesor është Hatixhe Muratova, e cila shfaqet në këtë dokumentar sikurse është në përditshmërinë e saj. Ajo është një bletërritëse maqedonase me origjinë turke që jeton në fshatin Bekirlija të komunës së Lozovës. Hatixhe jeton së bashku me nënën e saj 85-vjeçare pjesërisht të verbër, Nazifen, e cila është plotësisht e varur nga kujdesi i së bijës. Të dyja e sigurojnë jetesën vetëm në saj të fitimeve nga mjalti të cilin e Hatixhe e tregton në Shkup duke udhëtuar për katër orë në këmbë dhe me tren.