Flamuri kuqezi është valëvitur për herë të parë këtë fundjavë në Kampionatin Botëror, FIA Motorsport Games – Kampionati i Garave me Makina. Për herë të parë në histori Shqipëria mori pjesë në një kampionat botëror, me Alexia Karagunin dhe Kristofor Mjeshtrin (15 dhe 16 vjeç), të cilët garuan në disiplinën Karting Slalom. Të dy pilotët janë në hapat e parë të motorsportit. I kanë pasion garat me makina dhe kartingu është një mundësi për të hyrë në botën e motorsportit. Alexia është nga Tirana dhe nxënëse në një shkollë jo-publike në kryeqytet. Kristofor Mjeshtri është nga Poliçani dhe jeton në qytetin e tij. Është nxënës në shkollën publike te Poliçanit. Ka sakrifikuar gjatë kësaj periudhe duke udhëtuar nga Poliçani për t’u stërvitur në Tiranë. Kristofori ka qenë pjesëmarrës dhe fitues i disa garave në Kampionatin Kombëtar të Kartingut në 2019. Për rreth tre javë ata janë stërvitur intensivisht nga Auto Club Albania. Synojnë që ta vazhdojnë këtë rrugë. Synimi i FIA-s dhe i Auto Club Albania është që të krijojnë të gjitha kushtet për afrimin e të rinjve në motorsport.