Është aluduar shumë sikur fituese e këtij festivali do të ishte këngëtarja Elvana Gjata (vendi i dytë) me këngën “Me Tana” dhe lidhur me këtë pas festivalit ka pasur reagime të shumta apo spekulime mbi procedurën e votimit. Juria votoi për këngën fituese të Arilena Arës, me një total prej 67 pikësh, pasuar nga vendi i dytë, Elvana Gjata me 64 pikë dhe në vend të tretë, Sara Bajraktari me 50 pikë. Ishin 20 këngë që konkuruan për të fituar festivalin dhe për të përfaqësuar Shqipërinë në Eurosong, por vetëm 12 këngë kaluan në finale, të zgjedhura nga juria e përbërë prej: Christer Björkman, këngëtar dhe producent suedez, kompozitori grek Dimitris Kontopoulos, kryetari i delegacionit të Islandës Felix Bergsson, muzikologia shqiptare, Mikaela Minga dhe poetja shqiptare Rita Petro. Kjo e fundit e ftuar sot në studion e Wake Up, shpjegoi procedurën e votimit. "Gjatë gjithë kohës ne kemi pasur juristin pranë. Emri i Elvanës nuk është diskutuar asnjëherë as në juri as në dhomën e mbledhjeve. Për asnjë nga këngëatrët nuk është diskutuar. Në momentin e votimit juristi i Festivalit na tha se duhet të votonim në heshtje dhe gjatë procesit të votimit nuk do të bënim asnjë bisedë. Dhe kështu ndodhi. Nëse ka paqartësi rreth procesit deri sa të afrohet data e Eurosong-ut ka kohë plot që të hetohet juria nëse votimi ka qenë i rregullt apo jo"- tha ajo.