Përgjatë dy dekadave ne kemi parë si ka humbur dhe po humbet tradita e revistave kulturore dhe sesi po zbehet mendimi kritik përballë një shoqëria që vrapon pas kotësisë dhe pas sipërfaqësisë. E të themelosh një revistë letrare në këto kohë mund të tingëllojë si paradoksale por nuk është aspak e tillë për Ervin Lerën i cili ka marrë përsipër të rikthejë traditën e humbur të revistës kulturore dhe mendimit kritik mbi artin dhe kulturën. Revista "Lis" është botimi më i ri në tregun shqiptar që do të përfshijë art-kulturë dhe krijimtari. Numri i saj i parë është botuar të shtunën dhe do të jetë në versionin print dy herë në muaj. Ervin Lera vjen si Drejtori Ekzekutiv i kësaj reviste dhe Ben Andoni, kryeredaktor. Në faqet e kësaj reviste gjejmë editoriale, opinione, një hapësirë dedikuar letërsisë klasike, asaj bashkëkohore apo shqiptare, kinematografisë, teatrit, Nobelit e shumë rubrika të tjera që do të pasurohen javë pas jave.