Pandemia ka qenë pengesë për shumicën e artistëve për realizimin e projekteve të reja, por jo për grupin TNT të cilët i kemi pasur në studio në fillim të këtij sezoni. Pak ditë më parë ata kanë publikuar baladën me titull “Pse të ndjej” dhe ndërkohë janë duke punuar edhe për projekte të tjera. Këtë mëngjes në skype, vokalisti i grupit TNT Bekim Hallaqi ose Belle siç ai njihet me emrin e tij skenik na zbuloi se projekti i radhës do të jetë me një reper të njohur. "Është një bashkëpunim që do të bashkojë Shqipërinë dhe Kosovën"- tha ai pa zbuluar emrin e reperit. Kujtojmë se TNT është ndër grupet e para të krijuara në Kosovë, pasi ka nisur të bëjë muzikë që prej vitit 1974 dhe në karrierën e tyre numërojnë shumë bashkëpunime.