Vetëm gjatë fundjavës së kaluar në të gjithë vendin janë vënë në pranga jo më pak se 30 drejtues mjetesh, 16 prej të cilëve vetëm në Tiranë, gjatë operacionit të quajtur "Tispol". Ndërkohë janë pezulluar 186 patenta dhe janë vendosur rreth 4624 masa administrative për shkelje të ndryshme të Kodit Rrugor. Aksionet janë zhvilluar në të gjitha rrugët që përbëjnë rrisk, duke përdorur mjetet speciale për kontroll si dragera dhe radarë. Qëllimi i këtyre aksioneve ka të bëjë me evidentimin e drejtuesve të dehur, përdorimin e telefonit apo rripit të sigurimit, pajisjen me leje drejtimi, shpejtësinë tej normave...etj. Duke përdorur aparatet drager u është pezulluar leja e drejtimit 74 drejtuesve të mjeteve, të cilët drejtonin mjetin nën efektin e alkoolit. Gjithashtu nga kontrollet parandaluese, u konstatuan me radar 76 drejtues mjetesh, të cilët qarkullonin me shpejtësi që varionte nga 140 km/h deri në 174 km/h.