Panairi i 23-të i librit, ngjarja kulturore që bën bashkë autor dhe botues ndryshe nga vitet e tjera, këtë vit do të zhvillohet online për shkak të pandemisë, Covid-19. Është hera e parë që aktiviteti më i madh i librit mbahet online në 23 vitet e organizimit të tij. Ka qenë pikërisht Shoqata e Botuesve Shqiptarë që ka marrë këtë vendim pas refuzimit nga ana e Ministrisë së Shëndetësisë për organizimin si çdo vit të "Panairit të Librit “Tirana 2020”. Arsyetimi sipas Ministrisë së Shëndetësisë dhe të Mbrojtjes Sociale, për moslejimin e organizimit të Panairit ishte; “për shkak të rrezikshmërisë së lartë në përhapjen e Covid-19 gjatë këtij aktiviteti, në situatën në të cilën ndodhemi". Panairi i Librit (online) pritet të mbahet në datat 12-15 nëntor 2020. Sipas Petrit Ymerit, Kryetari i Shoqatës së Botuesve kjo formë organizimi është një sfidë si për organizatorët edhe për lexuesit. "Do të vendosen 6-7 monitorë në pikat kryesore të Tiranës ku do të shfaqen live të gjitha aktivitetet që do të organizohen gjatë ditëve të Panairit. Do të shfrytëzohen platformat online të shitjes së librave. Ne aktualisht po punojmë me Top Channel për ngritjen e një platforme online për organizimin e Panairit të Librit dhe shitjen e librave online"- zbuloi detaje kryetari i Shoqatës së Botuesve Shqiptarë, Petrit Ymeri.