Me shtimin e rasteve të prekurve me koronavirus në vendin tonë shqetësimi që ngrihet nga të gjithë është a i ka kapacitetet sistemi ynë shëndetësor t'u japë trajtimin e duhur të prekurve me Covid-19. I pyetur për këtë mjeku infeksionist Pëllumb Pipero tha: "Kapacitetet e spitalit infektiv shkojnë gjithsej në 100 shtretër. Kam theksuar disa herë që shërbimi i sëmundjeve infektive është i përgatitur për të përballuar skenarin e parë të kësaj epidemia. Ne tashmë po shkojmë në gjysmën e kapaciteteve reale të sëmundjeve infektive dhe ndoshta në varësi të situatës mund të shkohet në skenarin e dytë për të vënë në dispozicion të sëmurëve edhe spitalin "Shefqet Ndroqi". Mendoj dhe besoj fort se nëse epidemia ecën më këto ritme i kemi kapacitetet për ta përballuar atë"- tha ai. Sipas Piperos, aktualisht Instituti i Shëndetit Publik arrin të identifikojë 60-70% të rasteve të të prekurve me Covid -19 në vendin tonë dhe sipas tij kjo është diçka shumë pozitive për të parandaluar epideminë.