Dy sulmet brenda pak ditësh në zemër të Evropës, në Francë dhe Austri, të kryera nga ekstremistë islamikë, kanë rindezur jo vetëm në Perëndim por edhe këtu te ne, debatin në opinionin publik. Sado që e gjithë bota e njeh Shqipërinë si rast unik të bashkëjetesës dhe tolerancës fetare, përsëri të qenit mysliman apo shqiptar në Evropë, duket se ka marrë një goditje në imazhin e vet. Sa e vërtetë është kjo? Mjaftonte të shihje komentet e qytetarëve të këtyre vendeve në rrjetet sociale, të cilat ishin të mbushura në fakt me urrejtje jo specifikisht ndaj shqiptarëve apo myslimanëve, por emigrantëve. E ftuara që kishim sot jeton e punon në Paris, drejtore projektesh në France Telekom dhe është një nga shqiptaret më të suksesshme në Evropë. Por të gjithë e njohim më shumë për angazhimin si aktiviste dhe si nënkryetare e Këshillit Koordinues të Diasporës.