Pandemi na diktoi një tjetër mënyrë jetese nga çfarë ishim mësuar. Shumë sjellje të rutinës sonë të përditshme tashmë i kryejmë online. Nga ana tjetër etja e madhe për t'u informuar rreth virusit që ka gjunjëzuar botën shtoi rrjedhimisht edhe orët e gjata të qëndrimit mbi ekranet e celulareve, Ipad-ve apo TV. Pikërisht kjo sjellje e jona solli nga ana tjetër shtimin e problemeve me sytë apo të shikimit. Orët e tej zgjatura para pajisjeve teknologjike dhe ekspozimi i syve përpara ekraneve po na dëmton sytë. Gjithashtu numri i fëmijëve me probleme me shikimin po rritet çdo ditë, veçanërisht për sëmundje si çrregullimet e refraksionit dhe strabizmi, pohojnë mjekët në vend. Por a mund t'i shmangim probleme të tilla, cilat janë këshillat që duhet të ndjekim, kush janë kategoritë që duhet të kenë më shumë kujdes. Doktoreshë Orgeta Dervishi nga Lux Optika dhe pedagoge në Universitetin e Mjekësisë konfirmoi se ka një numër të shtuar pacientësh të cilët kanë shfaqur probleme me shikimin si pasojë e përdorimit të tepruar të këtyre pajisjeve dhe se cilat kanë qenë diagnozat që janë shfaqur gjatë kësaj periudhe dhe se çfarë kujdesi duhet bërë për të shmangur problemet me shikimin.