"Brandi" është një nga qentë më të përfolur të këtyre ditëve, të cilin e kemi parë nëpër mediet sociale por jo vetëm. Ai është heroi me 4 putra i Policisë së Shtetit i cili zbuloi personat e gjallë nën rrënojat e 6-katëshit në Durrës. Më konkretisht, pasditen e 26 nëntorit, teksa u ndërprenë punimet me mjetet e rënda që punonin nën rrënoja, u zhvillua kërkimi nga qeni policor. ‘Brandi’ u fut në një tunel, rreth 4-5 metra, i krijuar nga rrëzimi i objektit. Në këtë vend ka ardhur reagimi i qenit, i cili dha shenjë për praninë e njerëzve nën rrënoja, rreth 2 metra në thellësi. Ky nuk ishte misioni i parë i ‘Brandit’, pasi ai është përdorur për kërkimin e njerëzve të gjallë nën rrënoja edhe në shërbime të tjera më herët në Shkodër e Tiranë. Po ashtu edhe forcat speciale të policisë greke kanë qenë të pajisura me një qen të stërvitur për operacione të tilla.